ارفع کریم

ارفع کریم رندھاوا پاکستان کی وہ بیٹی ہے جس نے اپنی مختصر زندگی میں وہ کر دکھایا جس کی مثال عنقا ہے. ارفع نے اگرچہ کم عمری میں انفارمیشن ٹیکنالوجی میں مہارت کی وجہ سے دنیا بھر میں شہرت پائی تاہم حساسیت، جذباتیت، روحانیت، شاعری، موسیقی، علم فلکیات، معاشرت، احساس امروز و فکرفردا، وطن کی محبت، اشتیاق فن وادب اور کثیرالزبان قابلیت کے حسین امتزاج نے اس کی شخصیت کو اوج کمال پر پہنچا دیا۔

ارفع کریم کی زندگی پر بہت کچھ لکھا، بولا اور نشرکیا گیا ہے تاہم یہ کتاب پہلی مستند اور جامع کاوش ہے جسے والدین، رشتہ داروں،اساتذہ اور دیگر ماہرین نے بیان کیا جبکہ اعجاز مہاروی صاحب نے کمال مہارت اور ذاتی احساسات کے ساتھ اس کو الفاظ کا پہناوا دیا اور خوب حق ادا کیا۔ڈاکٹر ذیشان الحسن عثمانی صاحب نے جو بذات خود آئی ٹی کی دنیا کا ایک درخشدہ ستارہ ہیں، اپنے وسیع تجربے کی بنیاد پر اس کتاب میں اپنا حصہ ڈالا جس کی وجہ سے اس کہانی کے ساتھ منسلک کئے گئے بہت سے شکوک و شبہات اور من گھڑت بے بنیاد مفروضے بھی باطل ہوتے نظر آتے ہیں۔

ارفع کریم کی زندگی میں بے شمار مشکلات اور رکاوٹیں آئیں جن کا اس نے حوصلہ مندی سے مقابلہ کیا اور کبھی شکوہ ظلمت شب نہیں کیا۔سترہ سال کی عمر میں وہ ستاروں سے آگے کے جہانوں میں منتقل ہوگئی لیکن اس جہان میں اپنے عزم و جنون کے گہرے نقوش چھوڑ گئی جو آنے والے وقتوں میں ہراس نوجوان کے لئے مشعل راہ ہوں گے جو بلند خواب دیکھتے ہیں۔

                      والدین ارفع کریم

                                اور

                    تمام احباب جو بالواسط یا بلاواسطہ ارفع کے ساتھ منسلک ہیں۔